Լաս Վեկասի մէջ, Ն.Ս.Օ.Տ.Տ. Արամ Ա. Կաթողիկոս ականտես վկան եղաւ Արեւմտեան մեր Թեմի եկեղեցաշինութեան ծիրին մէջ նորագոյն աշխատանքներուն, որ այլապէս վկայութիւն է Թեմի գործունէութեան կենսունակութեան եւ հաստատ քայլերով տարածման։

Վեհափառ Հայրապետը անձնական օդանաւով մը Լաս Վեկաս հասաւ Չորեքշաբթի, 19 Հոկտեմբերի յետմիջօրէին ու ծխական շրջանին հետ եղաւ մինչեւ Ուրբաթ, 21 Հոկտեմբերի առաւօտը։ Նորին Ս. Օծութեան կ՚ընկերանային Թեմիս բարեխնամ Առաջնորդ Բարձր. Տ. Մուշեղ Արք. Մարտիրոսեան, միաբան հայրեր եւ Ազգ. Կեդրոնական Վարչութեան անդամներ։ Չորեքշաբթի երեկոյեան ու Հինգշաբթի առաւօտուն, շքախումբին միացան Թեմիս Ազգ. Վարչութեան անդամներ։

Ժամանման պահուն, Հայրապետական շքախումբը դիմաւորուեցաւ եւ հիւրընկալուեցաւ ծխական շրջանի հոգեւոր հովիւին, ծխական յանձնախումբին եւ Հայրապետի Լաս Վեկաս այցելութեան գլխաւոր հիւրընկալ Տէր եւ Տիկին Ալեքս եւ Արտա Եէմենիճեան բարերար ամոլին կողմէ, որ երեկոյեան կազմակերպած էր մտերմիկ ընթրիք մը։ Արձանագրուեցան ողջոյնի արտայայտութիւններ։ Վեհափառ Հայրապետը յատուկ գնահատանքով խօսեցաւ հւիրընկալ ամոլին մասինու դրուատեց Տիկին Արտա Եէմէնիճեանի մօր՝ Վերժին Գուճագեանի եկեղեցանուէր ու ազգանուէր ծառայութիւնները։ Ան եղած է Լաս Վեկասի Կիրակնօրեայ դպրոցի հիմնադիրը։

 Հինգշաբթի կէսօրին, Ս. Կարապետ եկեղեցւոյ Ծխական Յանձնախումբը Վեհափառ Հայրապետն ու ընկերակիցները հիւրընկալեց ճաշով։ Ներկայ էին շրջանի Հ.Յ.Դ. «Իշխան» կոմիտէին, հայկական միութեանց ու կազմակերպութեանց ներկայացուցիչները։ Բոլորին ակնարկները ուղղուած էին յետմիջօրէի ժամերուն, երբ տեղի պիտի ունենար կառուցման ընթացքի մէջ եղող եկեղեցւոյ օրհնութիւնը։

Արդարեւ, ծխական համայնքին ծանօթանալու եւ անոր իր պատգամը ուղղելու կողքին, Վեհափառ Հայրապետին Լաս Վեկաս այցելութեան գլխաւոր նպատակն էր կատարել քաղաքի Ս. Կարապետ եկեղեցւոյ հիմնօրհնէքը։

Առաջնորդ Սրբազանին, միաբան հայրերու, ժողովականութեան ներկայացուցիչներու հետ, Վեհափառ Հայարպետը Ս. Կարապետ եկեղեցւոյ համալիրը ժամանեց յետմիջօրէի ժամը 4ին։ Սպասման մէջ էին ծխական համայնքի պատասխանատուները, ներկայացուցչական դէմքեր ու բազմաթիւ ազգայիններ, որոնք շարիքն՝ եկեղեցւոյ բարերար Տիար Լէրի Պարնզ, Քլարք գաւառի պատասխանատուներէն Տիկին Քրիս Կուինչիլիանի, ներկայացուցիչներ առաքած էին Նեւատայինահանգապետ Պրայըն Սանտովանի, ծերակուտականներ Հէրի Ռիտ, Տին Հելըր եւ խորհրդարանականներ Շելի Պըրքլի ու Տոքթ. Ժօ Հէք. Վերջինները ողջոյին գիրեր ներկայացուցին Վեհափառ Հայրապետին։